خناقه لرب السماء

5:14 PM

انا عارفة ان بقالى كتير مش بادخل و حقكم كلكم على راسى

بس و الله الشغل من ناحية و البرد اللى حالف لا يسيبنى و لا يخلص عليا و يريحنى من ناحية تانية

و طبعا انتوا عارفينى لما بابقى عيانة الربع اللى ساترنى و ماشيه بيه بيضرب

و انا الربع ده بالذات مستموتة و ماسكه فيه بايديا و سنانى لانه لو راح منى هاتجيبونى من ميدان التحرير فى عز الظهر ببنطلون البيجاما و فردة شبشب بصباع و واقفة بانظم المرور

المهم علشان ما اطولش ال يعنى اول مرة ارغى و اطول

قاعدة فى الشغل فى امانة الله و كالعادة طبعا بافك فى طلاسم التيلى سيلز ربنا ينتقم منهم و من العملاء فى ساعة واحدة

و طبعا البرد عامل عمايله معايا رشح بقى و عطس و كحة و حبة ارتفاع فى درجة الحرارة على خفيف كده الارتفاع اللى بيولع الدماغ بس ما بيسيحهاش ده اللى هو الطبيعى بتاع البشر

و فجأة وقع فى ايدى اوردار بتاع علاء اقول عليك ايه بس يا علاء روح يا شيخ الهى ربنا ........ و لا بلاش الطيب احسن بس هو لو يبطل يكتب بصوابع رجله و الله الدنيا هاتمشى و هاتبقى نايس جدا

المهم الاوردر فى ايدى و طبعا كالعادة مش فاهمه منه اى حاجة و الباشا نايم فى بيتهم و لا فى دماغه الغلبانة اللى بتتحرق علشان تقرا خطه و فوق كل ده و ده قاعدة لوحدى زمايلى كل واحد طلع له مشوار مهم و سابونى اوفيس الون لوحدى

و انا طبعا سخنة و الاوردر سخننى بزيادة و مش هاخبى عليكم انا من فترة كده ابتديت احس انى لو كتمت فى نفسى و ما بعبعتش باللى جوايا هابتدى ادخل فى مواويل انا مش قدها ضغط بقى و سكر و كده و انا لسه صغيرة برضه فلقيت ان الحل الوحيد ان لما حاجة تضايقنى اقول على طول و ما اكتمش

طب انا قاعدة لوحدى

يا سلام و ماله ده احسن على الاقل افضفض براحتى و مفيش مانع انى اشتم كمان بس من غير الفاظ طبعا

فماسكة الاوردر و منك لله يا علاء روح يا شيخ ربنا ينتقم منك يا بعيد امال لو ما كنتش تعبانة يا ناس و سخنة و مش لاقيه حد يقولى سلامتك يا دوشة

اسمعها بتقولى يوووووووووووه اقرفينا بقى

بسم الله الرحمن الرحيم انتى مين ؟

انا اللى مستحملاكى بقالى سنين لحد ما طهقت منك كل شوية عيانة عيانة هو انتى اول واحدة تتعب يعنى و لا هو الشتا جه عند سيادتك لوحدك

يادى الخيبة انا كنت عارفة ان اخرتى فى مستشفى المجانين بس ما كنتش عارفة ان النهاية هاتبتدى بدرى كده اه يانى يا مه يا نى يا مه

بتأوأى ليه دلوقتى

بأوأ علشان خايفة انتى مين ؟

تانى نفس السؤال ما قلت لك انا اللى مستحملاكى بقالى سنين

طب انتى فين انا سامعاكى بس مش شايفاكى

هانبتديها غباوة بقى مش كده يعنى هاتشوفينى ازاى انا محدش يقدر يشوفنى

ايوه كملى بقى محدش يقدر يشوفنى و لا يسمعنى غيرك زى الافلام كده

انا كنت عارفة ان الافلام دى هاتجيب لك تخلف عقلى لا يا ستى لا انتى و لا غيرك يقدر يشوفنى

ليه ؟

لانى مليش وجود اصلا

يا فرحة امى بيا امال انا سامعاكى ازاى

اه ما انا اوديو بس تسمعينى اه لكن تشوفينى لا

طب بالراحة عليا شوية ابوس ايدك انا صحيح مؤهل عالى بس انتى عارفة تعليم بلدنا لا يسمن و لا يغنى من جوع زيه زى الاكل اللى على ميه لا طعم و لا ريحة

ماشى يا ستى هاخدك على قد عقلك اللى مش موجود اصلا انا موجوده جوه مخك

يا لهوى ورم

ارحمنى يا رب يا حبيبتى افهمى انا موجودة جوه دماغك لكن مش ورم انا قاعدة باراقبك و اشوفك بتعملى ايه فى الناس و الدنيا بتعمل فيكى ايه و بصراحة حسيت انك تعبتى و تعبتى اللى حواليكى

انا فعلا تعبانة جداااااااا و مش عارفة اعمل ايه البرد بجد تعبنى اوى و مش لاقيه له حل

لا انا حاسه انك زهقتى من الدنيا كلها و علشان كده هاقول لك على حل حلو

ايه هاتجيبى لى دوا حلو للبرد

يا بنتى هاريحك من البرد و غير البرد

ازاى ؟

رحلة

رحلة لفين ؟

هاتدخلى جوه مكانى و تشوفى الدنيا من جواكى

اقطع دراعى و اعمل عليه فته و افرقها على المساكين لو فهمت حاجة

بصى يا ام دراع انتى بتقولى البرد مضايقك مش كدة

اه

خلاص هاتفق معاكى على حاجة جميلة و هاتريحك تيجى نبدل

نبدل ازاى يعنى

تدخلى انتى جوا و اطلع انا بره

ايه الجنان ده يعنى ايه ادخل انا جوه و تطلعى انتى بره

يعنى انتى هاتقعدى جوه مخك معززه مكرمة و اطلع انا بره البرد يمرمط فيا و الشغل و البيت و الزحمة يمكن ساعتها تصعبى عليا و اقدر اتحمل صداعك اللى مسبباه لى باستمرار و علشان ابقى حقانية انا مش هاعمل اكتر من اللى بتعمليه يعنى هقلدك بالظبط و ده برضه علشان انتى تتفرجى على تصرفاتك و تقيميها

طب و الله فكرة حلوة بس هو ده ينفع

اكيد ينفع امال يعنى باهرج معاكى لو عايزة نجرب قولى موافقة بس و انا هاتصرف

خلاص موافقة

اوك ادينى بقى 10 دقايق اغير لك الملايات و اجيب لك فوطة نضيفة علشان تقعدى جوه مرتاحة

خلاص براحتك و اكون كمان كلمت مامتى علشان اكيد هاتوحشنى

هاتوحشك ايه بس ما انتى هاتشوفيها هو انا يعنى هاروح فين ما انا هاعيش فى بيتكم

اه صح . بس بقولك يا اسمك ايه انتى انا وقت ما احب اطلع هاطلع و هاترجعى انتى مكانك مش كده

اكيد طبعا . deal

Deal

و قبل ما يمروا العشر دقائق كنا مبدلين الادوار

و لانى كنت صاحية بدرى و البرد كان مجننى اول ما دخلت جوه روحت نايمة على طول اصل الجو كان دافى و جميل

بس خير اللهم اجعله خير صحيت على زعيق و خناق

ببص لقيت زورى الغلبان ملتهب و عمال يزعق و يقول كده كتير هو مفيش دم خالص مش هاين عليها تشرب كوباية ينسون واحدة مش قادر خلاص يا ناس دى هاتجننى مامتها بقالها ساعة بتتحايل عليها علشان تعملها اى حاجة دافية و دى اللى طالع عليها لا مش بحبه لا بقرف منه روحى يا شيخة منك لله

و لاول مرة احس انى بقالى سنين طويلة مش حاسه بالمسكين عمرى ما جالى برد و قدرت ظروفه و اديته حاجة دافية حقك عليا يا زورى يا حبيبى

شوية و لقيت عينى بتنفخ مالك انتى كمان

يا بنتى اتخمدى بقى حرام عليكى صاحية من بدرى و فى الشغل كمبيوتر و فى البيت كمبيوتر و لما بتحبى تريحينا شوية بتتفرجى على التليفزيون حرام عليكى مش قادرة يا ناس ده انا احمريت من السهر نفسى انام بقى طب و الله لا انام غصب عنك يا ناس الحقونى منها بقى دى بتفتحنى بالعافية امسكوا فى بعض يا جفون يا احنا يا هى النهاردة طب حد ابن حلال يطفى النور يارب الكهرباء تقطع عندكم علشان تنامى غصب عنك

المهم شوية و نامت و انا كمان نمت

اه نسيت اقولكم اننا اتفقنا اننا هانقطع الاتصال بينا لمدة يوم كامل

صحيت من النوم الصبح على صوت المنبه و هو بيرن زى السارينة و هى بمنتهى البرود بتطفيه و ترجع تنام تانى و اول ما ننام المنبه يرن تانى نقوم مفزوعين تانى

لحد ما ودانها صوتت مش قاااااااااااااادرة البتاع ده صوته مزعج ما تقومى بقى منك لله

المهم صحيت و لقيتها بتفتح الدولاب و لقيت كل العالم اللى جوا بيعيطوا فقلت لهم مالكم

لقيتهم بيقولوا لى اصل احنا عارفين اللى هايحصل دلوقتى هتطلع هدوم و تدخل تاخد دش

طب و هى النضافة وحشة

لا مش وحشة بس احنا دلوقتى دفيانين و هى ماعندهاش دم هاتروح تغرقنا مية

طب ما كده حلو علشان تفوقوا

اه نفوق بس اصبرى بقى لما تطلع من التواليت على الشارع على طول و انتى تعرفى اللى بنحس بيه و خصوصا و انها مش معترفة ان الناس فى الشتا بتلبس هدوم تقيلة مش بتبلطج و بتلبس هدوم خفيفة صيف شتا

المهم خلص الدش و طلعنا على الشارع و لقيتهم كلهم ماسكين فى بعض و الدراعات اتخشبت و الركب بتترعش و السنان بتخبط فى بعض و الهوا عامل زى التتار عمال يفترى عليهم و هما لا حول و لا قوة لهم و مفيش اى درع يحميهم لا جاكيت و لا بلوفر حتى

بجد صعبوا عليا

و اول ما وصلنا الشغل لقيتها بتنده عليا ايه رأيك فى القعدة جوه

هو انا كده بجد ؟

ليه انتى مش بتحسى بنفسك و باللى بتعمليه فيهم

لا بحس بس ما كنتش متصورة ان الوضع سيء اوى كده

و اكتر من كده كمان

طب خلاص طلعينى بقى

لأ اصبرى بقى لما اخلص شغل علشان تبقى خدتى اجازة 24 ساعة

ماشى

الشغل خلص و روحنا

طلعينى بقى

طب لما اروح البيت

ماشى

انتى جيتى يا دوشة

اه يا ماما

كويس انك جيتى بدرى اما انا النهاردة عامله لك غدا هاتاكلى صوابعك وراه

عامله لنا سمك يا ماما صح ؟

شوفتى الهنا اللى احنا فيه عايزة تاكل سمك و هى عيانة كده بذمتك الالتهابات اللى انا فيها دى هاتروح ازاى

معلش يا زورى يا حبيبى حقك عليا انا

لا و انا كمان مش قادر اخد نفسى و الله

معلش يا جهازى التنفسى

و انا كمان يا ابله تعبانه اوى

حتى انتى يا مناخيرى معلش يا حبيبتى

بالله عليكى تقولى لها تجيب لى قطرة علشان خلاص ما بقيتش قادرة

حاضر اول ما هاطلع من هنا هاشترى لك على طول

و انا عايز برادورال علشان الاحتقان

حاضر

و انا محتاجة فوار خصوصا بعد موضوع صوابعها اللى هاتاكلهم دول انا اهضم اكل اه لكن اعضاء بشرية مش هقدر من غير فوار

حاضر يا معدتى

طب بالمرة و انتى فى الصيدلية ابقى هاتى لى معاكى مسكن يا اما تكلفى نفسك شوية و تروحى تحشينى اصل السوسة هاتجننى و الله و فاضل لها شوية و توصل للعصب

حاضر يا ضرسى من عينيا

و بعد ما اخدت الروشتة منهم

بابص على الهانم لقيتها دخلت على المطبخ و ابص الاقى صينية مكرونة بالبشاميل و فراخ مشوية

قلت لها يلا بقى ادخلى و طلعينى اتغدا

لا اصبرى بقى انا نفسى من زمان ادوق المكرونة بتاعة مامتك

انتى هبلة و لا ايه ادخلى بسرعة و طلعينى المكرونة دى انا طالباها من شهر و ما صدقت انها عملتها لى

لا مش داخلة

لا بقولك ايه ادخلى من سكات الطيب احسن

لا مش داخلة و ورينى هاتعملى لى ايه ؟

يا بنتى ما تخلينيش اتهور عليكى

ما تقدريش

خلاص هاطلع لك بنفسى

و مين هايسيبك تعملى كده على فكرة العالم اللى جوه دول بقالهم سنين متعذبين بسببك يعنى لو عرفوا انك انتى اللى كنتى بتعذبيهم مش هايسيبوكى تطلعى من جوه سليمة

لا عنك انتى انا هقولهم و بعدين انا وعدتهم انى هاخلى بالى منهم بعد كده و مش هافترى عليهم تانى

صح يا رجالة

صح بس على الله تصدقى بقى

و الله ما هاعمل فيكم كده تانى هالبس تقيل و هاخد الدوا و مش هاكل سمك تانى و انا تعبانة

برضه مش هادخل الا لما اكل المكرونة الاول

يعنى انتى مش هاتجيبيها البر ماشى قوينا يا رب

المهم كلمة منها على قلمين تلاتة منى دخلت بعد ما طيرت لها سنتين و قطعت نص شعرها و برضه انا اللى اكلت المكرونة فى الاخر

نياهاهاهاهاهاهاهاها

و كل دور برد و انتوا طيبين

لا حول ولا قوة إلا بالله
يعنى أنا اروح من جنانك والهسس بتاعك ده فين ؟
ما فيش حته هربت ليها إلا والقاك مستنيانى فيها ؟
رغم إنى من المعجبين بكتاباتك ( من باب العبط يعنى )
إلا إن الموضوع ده معدى بجد
طول عمرى اقول عليك كاتبه من نوع جديد
بس نوع لسه ما نزلش السوق للاسف وما فيش غير النسخه الدوشجيه دى
ربنا يحمى قلمك من عين الحساد وخصوصاً أنا

طب ابعت لى بقى شعراية علشان احرقها مع البخور

يا استاذى ربنا يخليك و تفضل دايما ترفع معنوياتى كده

و هاتروح منى فين

دايما القهوة جمعانا على خير

اصل اللى يجتمعوا على التهييس مستحيل يعرفوا يبعدوا عن بعض ابدا

و شد حيلك بقى و نزل لنا حاجة جديدة علشان كتابات حضرتك وحشتنى جداااااااا

موضوع جميل اوي
ومضحك جدا
بس انتي مش بتتعظي يعني عارفه اللي فيكي
وبردو بتعمليه
فرحانه انك اكلتي المكرونه

ياريت الناس تشوف نفسها بالطريقة السهلة دي
بس الغالب كله بيكابر ومفكر نفسه صح
موضوع جميل بس شوقتيني للمكرونه
ممممممممممممم

يا قمر انتى الاجمل

و لو على المكرونة فتعالى نورينا و انا اعمل لك احلى مكرونة بالبشاميل فى مصر كلها علشان خاطر عيونك

و بجد انا واحدة من الناس بابقى عارفة انى غلطانة بس بجد غصب عنى مش عارفة اتغير

عارفة انى بافترى على صحتى

بس انا للاسف خلاص اخدت على كده

مستحيل اتحمل اللبس التقيل و لا الحاجات الدافئة دى

ربنا يستر علينا بقى

هههههههههههههههه
احنا معاكى فى مشاركة وجدانية فى البرد دة
وكل حكاية شتوية وانتى طيبة

و انتى طيبة يا قمر

بس تعاطفك لوحده مش كفاية

اتبرعى و لو بشريط برادورال حتى و الاجر و الثواب عند الله

بجد حاجه لوكس
آخر دلع ،آخر مزاج وسلطنه
اذا مابتوصليش للحاله دى غير بالبرد خليكى بردانه على طول
طبعا بهزر
ربنا يشفيكى
دمتى مبدعه ومتألقه

ربنا يخليكى يا قمر

بس انا مستعدة اهسهس و اكتب لكم من غير برد و الله

بس دعواتكم ربنا ينتقم من البرد و يحل عنى بقى

روعه جدآآآآآآآآآآآآ
تسلم ايدك بجد تحفه
انا كنت مستمتع جدآ وانا بقرا الموضوع
ولكى منى التحيه والتقدير منى
بس اسمحيلي اعزم نفسى عندك على المكرونه بالبشمل
روعـــــــــــــــــــــــــــه

اختك فى الله
كيلوباترا

يا قمر ربنا يخليكى و ميرسى بجد على ردك الجميل ده

و المكرونة تحت امرك بس انتى تعالى نورينا

مامتى بتعملها ملهاش حل

أولا نتمنى لك الشفاء العاجل ،

وثانياُ انتي فعلا لك حضور مميز في المنتدى و كما قال الأخ الأدمن انك مكسب للمنتدى

وأنا شخصياً بستمتع بمواضيعك الجميلة

دمتم سالمين

موضوع جميل واشكرج على المجهود وانتظر جديدك انشاء الله نااااااااايس قلبوووووو ;)

شكرا لمروك اختي

واسعدني تواجدك في موضوعي

انتى خليتى للبرد اهميه وقيمه كبيره

بيخرج منك ابداعات جميله

وكمان جميل اوى انك عارفه عيوبك يا ريت تصدقى بقى مع اعضائك المساكين

لحسن تصحى يوم الصبح تلاقيهم عانملين عليكى ثورة زى شباب التحرير و بتاعت تونس

وتضطرى تسيبى نفسك وتخلعى بعيد

وهى بقى تعيش لوحدها وتاكل اكل ماما الجميل

وتقعد على النت

وتبوظلك الشغل

ومش بعيد تكون السبب فى رفدك

ميرسى يا قلب

بس بجد تفتكر ممكن يعملوا عليا ثورة

طب و ساعتها هاعمل ايه و السعودية هاتكفى مين

و لا مين مش يمكن يقولوا لى المشرحة مش ناقصة قتلة

اه يا عينى عليكى يا دوشة يا اللى هاتتشحططى و انتى لسه فى عز شبابك

عموما انا هاحاول اتعظ من اللى حصل لغيرى و ادعم السلع و ارفع المرتبات

موضوع رائع وجميل تسلم الايادى تقبلوا تحياتى

شكرا اسعدني مرورك

ايه يا دوشه هو

البرد لسه موجود معاكي

هههههههههههههههه
برااااااااااااافو
وفعلا ان لبدنك عليك حق

أولا نتمنى لك الشفاء العاجل ،

وثانياُ انتي فعلا لك حضور مميز في المنتدى و كما قال الأخ الأدمن انك مكسب للمنتدى

وأنا شخصياً بستمتع بمواضيعك الجميلة

دمتم سالمين
تقبلي مروري

موضوع رائع وجميل يا دوشــــــــــة تسلم الايادى تقبلوا تحياتى

شكرا اختي الغاليه

لا تحرمينا من زيارت مواضيعي

دمتي بخير

اذا كنتى فى حاله خطر استعينى بصديق

واحزرك من الثوار ممكن يولعو الدنيا الله يعنك لكى كل التحيه والتقدير تقبلى تحياتى

» فرش Brushes السماء
» سقوط جسم ناري من السماء بسوهاج
» تفسير الأحلام في تأويل السماء والليل
» الصحف الاسبانية ترفع برشلونة إلى عنان السماء بعد التتويج الأوروبي
» سمعنا كثيراً عن السماء تمطر ماءً ....تمطر ثلجاً... لكن تمطر سمكاً !! .... شاهد ولن تندم

خناقه لرب السماء

خناقه لرب السماء

مواضيع مماثلة

مواضيع مماثلة