يا عزيزة يا ولاد يا عزيزة يا ولاد انا جيت

فى ايه يا ابو سيد عامل غارة ليه يا اخويا

تعالى يا عزيزة هاقولك على خبر هايفرحك

خبر ايه خير يا رب

ابو سيد بفرحة : ده خير قوى يا ام سيد انا النهارده قبضت الجمعية

طب الحمد لله بس اوعى تنسى تروح تديهم لابو اشرف انت عارف الراجل اول ما طلبناهم منه عشان نعمل الحمام اللى كان هايقع على دماغ الجيران ما اتأخرش علينا و ادانا الـ 500 جنية على طول مش عايزين نتأخر عليه

لأ أتأخر عليه ايه ده انا عديت عليه على القهوة قبل ما اجى

طب الحمد لله يا اخويا ربنا يسدد ما عليك و يا رب يكون ليك ما عليك . اقوم انا اشوف الغسيل

استنى بس غسيل ايه ؟ خدى يا ام سيد

ايه ده جبت الـ 50 جنية دى منين

اول ما العيال سمعوا سيرة الـ 50 جنية جم جرى

اصل الجمعية يا ستى طلعت 550 و اتارينا كنا حسبينها غلط

يا ما انت كريم يا رب

قولى لى بقى هانعمل ايه بالـ 50 جنية

اقولك احنا نشيلهم انت بتشوف لما حد من العيال بيعيا بنحتاس بيه

لا يا بابا مش عايزين نشيل حاجه

اخرس ياواد منك ليه

انا برضه من رأى العيال الفلوس دى احنا ما كناش عاملين حسابها يعنى جت من باب الله . انا شايف اننا نتشبرق بيها
نتشبرق بـ 50 جنية انت اتجننت يا راجل احنا نشيلهم احسن بيقولوا البلد داخلة على ايام سودا و فيه انفلونزا خنازير افرض حد مننا لقط ما نعرفش ساعتها نعالجه

انفلونزا اللى انتى شايله همها يا وليه يا خلل امال الحكومة بتعمل ايه انا قولت هانصرفهم يعنى هانصرفهم
طب خلاص مادام مصمم تصرفهم يبقى تجيب لك جزمة جديدة بدل الجزمة اللى دابت فى رجلك دى

جزمة ايه ما الجزمة زى الفل اهى هى كانت اشتكت لك

ما اشتكتليش انا بس اشتكت لعبده الجزمجى اخر مرة قاللى لو دقينا فى الجزمة مسمار زياده هاتفجر نفسها و تخلص من القرف اللى هى فيه

و النبى قولى له يتلهى . هو يعرف يجيب زيها . بلا جزمة بلا زفت انا باقول نعمل بكرة غدوة محترمة بالفلوس
يا لهوى غدوة بخمسين جنية ليه . انت اتجننت يا راجل

ايوه يا بابا ربنا يسترك احنا عايزين نعمل اكله حلوه و النبى

اكلة ايه يا منيل انت و هو . يا ابو سيد اشترى لك جزمة احسن
الاكل ده كله فى الاخر سد جوع و ما حدش شايف بناكل ايه

و هى الناس مالها انا عايز اجيب اكله حلوة للعيال
يا راجل الناس ليها الظاهر و المثل بيقول ادخل على الناس معرش و لا تدخل مكرش

معرش ايه و مكرش ايه يا ام سيد خلينا نفرح العيال و النبى ما تكسرى بخاطرهم
اه و النبى يا ماما

طب خلاص عايزين تاكلوا ايه
ايه رايكم يا عيال نجيب كيلو لحمة و نطبخ

لحمة ايه لا يا بابا العيد قرب و عم سلامة الجزار اكيد هايجيب لنا لحمه . احنا نفسنا فى الفراخ

نفسكم فى الفراخ !!! امال لو ما كنتوش واكلينها الاسبوع اللى فات

و هو انتى بتسمى اجنحة الفراخ اللى بتأكليها لنا دى فراخ احنا عايزين فراخ بحق و حقيقى

دلوقتى الاجنحة ما بقيتش عاجباكم يا نمرود منك ليه

ايوه يا ماما عايزين فراخ و يا ريت بقى تعمليها لنا زى ام حماده ما بتعملها لهم

و ام حماده بتعملها ازاى ان شاء الله

امه بتحطها فى البيض و بقسماط و بتقليها بيقول بتبقى طعمها حلو قوى

العيال كلهم فى نفس واحد ايوه يا ماما اعمليها لنا كده

لا بقى مادام الكلام على فراخ يبقى حلة محشى كرنب لكن بيض و ما اعرفش ايه ده ما يلزمناش . فرخة يعنى مرقة و محشى و لا ايه رأيك يا ام سيد
و هو انت محروم من المحشى يا راجل

لأ مش محروم لكن على مرقة الفراخ اكيد غير لما يبقى اورديحى

خلاص يبقى محشى و فراخ

و ما تنسيش الملوخية يا عزيزة

و ملوخية كمان عشان عيونك هو انا ليا اعز منك يا ابو سيد

تسلمى لى يا غاليه يا سلام دى هاتبقى ليله يا عمده

هههههههههههههه

تانى يوم الصبح ام سيد بتصحى خلف عشان يروح الشغل

يا خلف يا خلف قوم يا راجل هاتتأخر على الشغل

لأ شغل ايه انا مش رايح النهارده

مش رايح ليه ؟ انت عيان كفى الله الشر

لأ مش عيان بس قاعد مستنى المحشى و الفرخة

فرخة ايه اللى هاتقعد لها قوم يا راجل شوف اكل عيشك

يا عزيزة سيبينى الله يسترك انام كويس عشان اقوم اساعدك و كمان انا مش عايز اسرح النهارده و البلدية يغيروا دمى و اجى فى الاخر قرفان ما اعرفش اتهنى بالمرقة
يا دى النيلة على المرقة اللى هاتجننك

يا ستى سيبينى الله لا يسيئك و انزلى انتى هاتى الحاجة

خلاص براحتك عيشنا و شوفنا الراجل هايجرج فى البيت عشان الفراخ

و هو انتى كنتى شوفتى الفراخ فين قبل كده
طب نام يا اخويا نام

اول ما تيجى تصحينى عشان اشوف الفرخة

ام سيد نزلت السوق جابت الكرنب و الملوخية و مستلزمات المحشى من خضرة و رز و راحت طالعة على الفرارجى و لاول مرة تدخل المحل بقلب جامد و منفوخة على اخرها ما هى كل مرة كانت بتتكلم بصوت واطى و تدخل متدارية عشان ما حدش من الجيران يشوفها و هى بتجيب الاجنحة

عايزة فرخة يا حسن

تكون قد ايه يا ستى

عايزاها كبيرة

الراجل وزن لها الفرخة و نضفها بالهنا و الشفا يا ستى

يا ابو سيد قوم اصحى يا راجل

جبتى الفرخة يا عزيزة

اه يا خلف جبتها

وريهالى كده يا سلام يا سلام دى اكيد هاتطلع مرقة ما حصلتش

و قعدت ام سيد و ابو سيد يقطفوا الملوخية سوا و يحلموا بالمحشى على شوربة الفرخة لحد ما سمعوا صوت حاجه بتترزع فى المطبخ

جريوا هما الاتنين على المطبخ لقوا الحلة الى فيها الفرخة واقعة على الارض و الشباك مفتوح بيبصوا من الشباك لقوا قطة ماسكة الفرخة بسنانها و بتجرى

ابو سيد طلع جرى و دخل فى سباق 100 متر حر مع القطة انه يقدر يحصلها و ينقذ الفرخة لكن ما قدرش

طبعا ام سيد قعدت تعيط على الفرخة اللى ما لحقوش يتهنوا بيها و على الـ 50 جنية اللى راحت بلاش

ده غير العيال اللى اتنكدوا ده حتى الواد سيد لقوه واخد السكينة و مصمم يدبح قطط الشارع كله

بعد ما اضطروا ياكلوا المحشى اورديحى زى كل مرة ابو سيد قال لام سيد
دى حتى القطة بنت اللذين ما صبرتش لما كنا نسلقها و خطفتها نيه

و كان ايه الفرق يعنى

اهوه كنا ندوق المرقة بتاعتها على لاقل

يا دى المرقة اللى جننتك مش انت اللى قعدت تنق فيها و هاتبقى ليلة يا عمده أهى الفرخة طارت يا ابو العلا

تسلمى يا دوشة تجننى عقبال ما تجيبى كل انتاجاتك هو موضوع خد العاقلة بنت المجنونة وماتاخديش المجنونة بنت العاقلة بتاعك ولا لا لان فى منتدى موجود فى الموضوع لو عاوزة تجيبية
0

و كله موجود فى المدونة و ان شاء الله هانزلهم واحد واحد

كل سنة و انت بالف خير و ان شاء الله السنة الجاية تبقى معاك عروسة و 3 عيال كمان ان شا الله ماحد حوش

تسلمى يا دوشة 3 عيال مرة واحدة حتجوز ارنبة

يا ابنى مفيش حاجة بعيده عن ربنا

و التوائم كتروا فى البلد اليومين دول

اتكل انت بس على الله و ربنا يوفقك ان شاء الله

جميلة اوى يادوشه سلم قلمك الجميل

اهى القطه اخدتها وطارت ياعينى عليهم اكلوا المحشى اورديحى

رغم انى متابع جيد لكل اعمالك الا انى اول مره اقراء الموضوع الجميل ده

رائع رائع

طبعا طول عمرك روعة
من غير مجاملة
بتضحكينى بجد
دى موهبة
ربنا يزيدك وتهتمى

تسلم ايدك يا استاذة

انتى خليتى للبرد اهميه وقيمه كبيره

بيخرج منك ابداعات جميله

وكمان جميل اوى انك عارفه عيوبك يا ريت تصدقى بقى مع اعضائك المساكين
لحسن تصحى يوم الصبح تلاقيهم عانملين عليكى ثورة زى بتاعت تونس
وتضطرى تسيبى نفسك وتخلعى بعيد
وهى بقى تعيش لوحدها وتاكل اكل ماما الجميل
وتقعد على النت
وتبوظلك الشغل
ومش بعيد تكون السبب فى رفدك

ميرسى يا قلب

بس بجد تفتكر ممكن يعملوا عليا ثورة

طب و ساعتها هاعمل ايه و السعودية هاتكفى مين و لا مين مش يمكن يقولوا لى المشرحة مش ناقصة قتلة

اه يا عينى عليكى يا دوشة يا اللى هاتتشحططى و انتى لسه فى عز شبابك

عموما انا هاحاول اتعظ من اللى حصل لغيرى و ادعم السلع و ارفع المرتبات

يوه قصدى هاتقل اللبس و اخد الدوا و ربنا يستر

صباااح الخير يا دوشة

اما الموضوع ده له عندي معزة خاصة

كان فيه اول مشاركة ليا في القهوة القديمة

اييييه كانت ايام

هو انت متاكد انها اللى كانت فى الحله فرخة اصلى القطط مش عتروح غير على الفيران
ههههههههههههههههههههههههههههههه

مرسي لمرور حضرتك

ويارب يكون عجبك الموضوع

اسعدني مرورك

رورورورورورورورورورى احلى زعروطى منى تقبوا تحياتى

مبروك مبروك مبروك مبروك عليكم وعلينا
لولولولى
عقبال المليووووووووووووووووون يارب
وكلنا بصحه يارب
كل سنه وانتم طيبين

جميله جدا يا دوشه
ده واقع فعلا بنشوف منه كل يوم
حال الاسرة المصريه تحت خط الفقر
الحمد لله ان ربنا بيسترها معاهم
وفرحان جدا اننا كسبنا قلم جديد بيكتب بروح الفكاهة فى ابن مصر
استمرى

بصراحه ما شفتش اروع من كده


هي دوشه بس دوشه لزيزه


اسعد الله ايامك

موضوع جميل

طب خلاص مادام مصمم تصرفهم يبقى تجيب لك جزمة جديدة بدل الجزمة اللى دابت فى رجلك دى

جزمة ايه ما الجزمة زى الفل اهى هى كانت اشتكت لك

ما اشتكتليش انا بس اشتكت لعبده الجزمجى اخر مرة قاللى لو دقينا فى الجزمة مسمار زياده هاتفجر نفسها و تخلص من القرف اللى هى فيه



علي فكره احنا اللي هنتفجر من كتر المسامير اللي بدقيها في دماغنا بمواضيعك الجامده اللي عامله زي الشواشكيش

بس شغاله يا دوشه

يا سلام علي الكلام

انت بس اللي مصدع لوحدك وكمان رابط دماغك جاهز

شكرا علي التشجيع

ايه الموضيع الجامده
على فكره مش خلف انا الى فى الموضوع اه

بارك الله فيك...؟