امبارح حصلت لى مفاجأة خليتنى طايرة من الفرحة من السعادة

و الله يا جماعه الفرحة اللى فرحتها ما فرحتهاش من يوم ما الزمالك اخد اخر بطولة ليه

احكى لكم بقى و افرحكم

امبارح قبل العصر كده لقينا طنط منى صاحبة ماما بتتصل و تقول انها جايه لنا

طبعا مش دى المفاجأة ما طنط منى دى مشرفه عندنا كل اسبوع

عاملة كده زى حقنة التراى بى اللى امى بتاخدها كل يوم سبت

المهم علشان ما اطولش عليكم

ماما قالت لى قومى طلعى كيس فراولة من الفريزر علشان يلحق يفك على ما طنطك منى تيجى

و بافتح الفريزر علشان اطلع الكيس و الاقى لكم

و الله ما هاتصدقوا

لقيت 6 اكياس طماطم كل كيس فيه ما يقرب من 2 كيلو

اه و الله الطماطم ام 8 جنية الكيلو و عند ابو احمد الحرامى بعشرة و اتناشر كمان

اتارى الست اكياس دول كانوا مستخبيين ورا الفراولة و مش باينين اكمنهم حمر زى الفراولة

المهم انى بعد ما فوقت من الصدمة و قدرت اتوازن ما بقيتش عارفة اوصل الخبر السعيد ده لأمى ازاى

احترت يا جماعه

اقولها لها بطريقة مباشرة و لا فى الاول امهد لها و اجيب لها الخبر واحده واحده

و لا انده حد من الجيران يقول لها هو علشان لو جرى لها حاجة من الفرحة ما تبقاش نهايتها على ايدى انا و اعيش بذنبها العمر كله

المهم توكلت على الله و قولت ادخل عليها و اقول لها و اللى يحصل يحصل

بس زياده فى الاطمئنان كلمت اخويا و قلت و انت جاى من الشغل هات لنا معاك مهدأ لماما

ليه بس

خوفت اقوله على السبب لحسن من فرحته يمشى مذهول فى الشارع و تخبطه عربية لا قدر الله

قلت له لأ اصل طنط حنان جارتنا اللى فوق وقعت من البلكونة و هى بتلم الغسيل و الاسعاف جت شالتها و انا خايفه يجرى لها حاجة فماما تتصدم من الخبر

قالى و هى يعنى ماما كانت بتقبلها ما هى على طول قرفاها بغسيلها اللى بينقط علينا و كل يوم فى خناق و مشاكل

قلت له يا حبيبى ما انا خايفه على امك من الفرحة لما تعرف انها خلصت منها و الى الابد


و قومت علشان اقول لماما و انا كلى امل انها تقدر تتماسك بعد ما تسمع الخبر الجميل ده

ما هو مش معقولة خبر الطماطم يكون اصعب من يوم ما لقت كيس لحمة مستخبى فى قعر الفريزر و احنا اخر الشهر يومها الدمعة كانت هاتفر من عينها يا حبيبتى يا ماما

و لا يوم ما راحت السوق و اكتشفت ان فى بياعه بتبيع الجرجير الحزمتين بنص جنية و عليهم واحده بقدونس هدية

يومها الناس اللى رجعوها لنا البيت قالوا لى انها اغمى عليها و فوقوها 3 مرات و بعد ما قامت اصرت تشترى بكل الفلوس اللى معاها جرجير

اصله الجرجير الحزمة بقت بنص جنية وهما 10 جرجيرات مش اكتر و البقدونس شرحه و الحزمة مفيهاش غير 6 اعواد بس



المهم دخلت عليها و قلت لها ماما عندى خبر حلو و خبر وحش

قولى الحلو الاول

لأ هاقول الوحش اكياس الفراولة اللى فى الفريزر نقصوا 6 اكياس

ايه ليه راحوا فين شربتيهم يا طفسة و انتى عندك حساسية

لأ و الله

يبقى اتفزلكتى و عملتى بيهم حاجة حلوة علشان منى

هى طنط منى غريبة علشان اعملها حاجة حلوة دى صاحبة بيت

طب يا بنتى ما تعتبرينا احنا كمان اصحاب بيت و ترحمينى انا و اخوكى من اختراعاتك

يعنى هو ده وقته . هاتسيبينى اقولك الخبر الحلو و لا لأ

قولى يا وش السعد

قلت لها الاكياس طلع فيها طماطم مش فراولة




ايه ده ماما ماما مالك يا حبيبتى ماما ردى عليا اوعى يجرى لك حاجة

يجرى لى حاجة و اسيبكم تتهنوا بالطماطم لوحدكم

الحمد لله انتى كويسة

اه كويسة و راحت راقعه زغروطتين

تصدقوا يا جماعه الناس اللى جم يهنونا بعد ما سمعوا الزغاريط و شافوا فرعين النور اللى علقناهم من الفرحة اكدوا ان الاكتشاف ده اهم من اكتشافهم ان صلاح عبد الله هو اللى دبر الحادثة بتاعة نور الشريف فى مسلسل الدالى

انا كنت هانزل الموضوع ده امبارح بس من ساعة ما الخبر اتعرف و انا مش ملاحقه على التليفونات

العاشرة مساء و القاهرة اليوم و مصر النهاردة و الحياة اليوم و 90 دقيقة كلهم بيتسابقوا علشان يعملوا معايا حوار

ده غير مدحت شلبى من امبارح و هو قارفنى عايزنى اطلع معاه فى مساء الانوار بيقول هايجيبنى و يكنسل لقاء مرتضى منصور

ده حتى استاذ ابراهيم حجازى اكد لى انه على استعداد يلغى الحلقة اللى عاملها علشان حرب اكتوبر يوم الاربعاء و يعمل معايا حاقة خاصة بالمناسبة دى

بس انا بصراحه ما وافقتش

اصلهم مصرين اجيب معايا الاكياس علشان يتصوروا معاهم و انا بينى و بينكم كده خايفه عليهم من الحسد

على فكرة الخبر هاتلاقوه نازل فى المصرى اليوم بس للأسف مش لاقية اللينك

الصحفى بيقول ان الاكتشاف ده اعظم اكتشاف حصل من بعد اكتشاف مقبرة توت عنخ امون و ان ده يعتبر اهم حدث فى 2010

و فيه كوادر تعليمية رفيعة المستوى طالبت بانه ينزل فى كتب التاريخ ابتداء من الطبعه الجديدة ان شاء الله

اخر حاجة احب اقولها لكم اننا اخيرا هانعمل محشى و عقبال عندكم كلكم يا حبايب

يا جماعه احنا عندنا قفص الطماطم كله على بعضه بيعمل 23 جنيه فيه اكتر من 27 كيلو

يا سلام
يعنى كيلو الطماطم واقف بـ ...
يا لهوى 85 قرش
طب ما تورد لى و انا على استعداد افرش بيه تحت البيت عندنا و يا بخت من نفع و استنفع يا جدو

و انا على استعداد

ابعت لى بس حضرتك العنوان و هاتلاقى العربية واقفه تحت البيت فى خلال ساعه من الان

شكلها هاتعلب يا دوشة

اية دة
لا حول ولا قوة الا بالله
احنا الطماطم النضيفة عندنا ب4 جنية
هو الموضوع دة قديم ورجع تانى
0

كان من ايام الازمة يا بلطيه

بس قلت ننزله تانى

لازم نشغل القهوة بعد الاعصار اللى حصل

كل سنة و انتى طيبة يا قمر

و على فكرة احنا احلى طماطم عندنا بـ 3.5 بس

ابعت لك 2 كيلو

انا اسفة يا دوشة العتب على النظر
بس انا قلبى كان خايف لتكون الطماطم هتغلى تانى
0

تسلمى يا دوشة انا اشتريت النهاردة من هايبر جيان فى الكويت
كيلو طماطم اردنى الكيلو بس ورخيص ب750فلس
يعنى حوالى 15جنية دا انتم فى عز
تسلمى على الحدوتة المفروض انك تتصورى

اتصورت يا اخويا و انا ماسكاهم

و لما ترجع مصر ابقى روح المتحف هاتلاقى الصورة هناك هاتعجبك اوى

بس موضوع الطماطم ان 15 جنية ده جد يا فارس

يا حومتى

الله يكون فى عونك يا ابنى

انا لو منك ارجع بقى اهو كيلو الطماطم بقى ب 2 جنية بس

صحيح اللحمة وصلت ل 65 و فى مناطق 70 و الضانى بقت ب 75

بس مش مشكلة المهم الطماطم

مش كده و لا ايه

هههههههههههه
فكرتينى يا دوشة فى ايام الازمة
لما فتحت درج التلاجة لقيت فيه 6 طماطمتات
وعملت فرح وقولت لماما ماما ماما فى طماطم
من الحمرا المدورة دى اللى فيها عنقود اخضر اللى بتزرع دى
ياااااااااااااااااااااه كان يوم
وبرده مرة صاحبتى كلمتنى على الموبايل مخصوص
عشان تقولى ان عندهم طماطم فى البيت

يالا عادت الطماطمية لسعرها القديم
وعقبال جنونتها الجاية

العاشرة مساء و القاهرة اليوم و مصر النهاردة و الحياة اليوم و 90 دقيقة كلهم بيتسابقوا علشان يعملوا معايا حوار

الحوار دا كان هايبقى فى التلفزيون دوشه واكياس الطماطم وطبعا كان فى مقدمات للبرنامج خوفا على ارواح المواطنين


ده غير مدحت شلبى من امبارح و هو قارفنى عايزنى اطلع معاه فى مساء الانوار بيقول هايجيبنى و يكنسل لقاء مرتضى منصور

كان مرتضى هايرفع عليكوا قضيه وهايكسبها وهاياخد اكياس الطماطم

ههههههههههههههه

والله نورتو المنتدي يا جماعه
هي روح الحوار دي

اسعد الله اوقاتكم

تسلم إيديكي أختى على الموضوع

اقدر مروركم لكم جزيل الشكر

مواضيعك والله اختي دوشه

جميله جدا
انت فعلا

مكسب للمنتدي

بارك الله فيكي

فعلا تستحقين التقدير

تقبلي مروري

بسم الله الرحمن الرحيم
أنا مصري ولى الفخر,,,لى الفخر بأن هؤلاء الشباب هم أخوتى من بلدى
ان مصر فيها من الشجعان ما يجعلنا أن نرفع رأسنا ...
أعترف بأن ثقتى كانت مهزوزة بهؤلاء الشباب
لكنهم أثبتوا لأنفسهم وللعالم كله بأنهم أبطال ,,,,
أحفاد من بنوا الأهرامات ,,,,
وأبناء من عبروا بمصر لبر الأمان
يقول من يقول,,,ويشكك من يشكك
لكن هؤلاء الذين يشككون هم على ثقة وعلى قدر كافى بقوة هؤلاء الشباب الذين هزوا العالم أجمع
أنا مصري وفخوربكم ,,,أخوتى وأخواتى
ليتنى كنت فى صفوفكم
أنصرنا يا رب
فالنصر لنا ان شاء الله من ابو عبد العزيز من الفخر بان اكون مصرى دائما

ان اشكر المدير العام على تقبلى عضوآ جديد فى المنتدي

مرة واحد خد زوجتة حديقة الحيوانات و صورها جنب قفص القرود

و علق الصورة فى الصالون و كتب تحت الصورة


هذه صورة زوجتى مع القرود

ملحوظه زوجتى الثالثه على اليمين
:lol: