انا كمان عايزة اتجوز اشمعنى يعنى غادة عبد العال




على الرغم من ان مش هو ده موضوعنا اللى عايزة اكلمكم فيه


بس انت لو سألت بنت فى ابتدائية نفسك فى ايه يا حبيبتى

هاتقولك نفسى اتجوز

طب و الابتدائية

ابقى اخدها على مهلى بقى فى بيت جوزى

عموما

مش هى دى مشكلتنا

انا زى باقى الناس اتفرجت على المسلسل

و قبله كنت قريت الكتاب التحفه اللى كاتباه غاده عبد العال ( عايزة اتجوز )

و اكتر حاجة لفتت انتباهى فى الكتاب موضوع جواز الصالونات

طبعا الفكرة موجوده و كلنا بنتعرض لها كل يوم شباب و بنات

يعنى مثلا طنط ام مصطفى تيجى تستلف من ماما قزازة زيت

الشيطان يوزها انها تكتم على القزازة و ما تردهاش

و علشان ماما ما تقدرش تتكلم و تطالبها بقزازاة الزيت تروح الوليه الارشانه عامله ايه

تجيب لى عريس

و اهى تدخل ده فى ده راس فى راس و خلاص

او طنط محاسن عايزة عايزة تقبض الجمعيه بدل ماما و مش قادرة تفاتحها فى الموضوع

تعمل ايه

تروح جايبه لى عريس

و طبعا ساعتها ماما من نفسها هى اللى هاتعرض عليها انها تقبض الجمعيه فى دورها

و طنط ام مروة صاحبة ماما الانتيخ تحضر معاها فرح و تشوف امى و الدمعه هاتفر من عينها فى الفرح

تفتكرها بتعيط علشان بنتها لسه ما اتجوزتش

ما تعرفش ان سبب دموعها ان الطبق اللى نزل قدامها الجاتوة اللى فيه شيكولاته و هى ما بتحبش كده ده غير ان الطبق نازل من غير باتون ساليه و هى مزاج عندها تسقيه فى البيبسى

تقوم برضه جايبه لى عريس

ده غير طنط شوقيه اللى نفسها تنتقم من امى باى طريقه علشان على طول المحفظة بتاعتهم بتشكر فى طريقه حفظها و بتبستف طنط

تقوم تعمل ايه تنشنى عريس فى دماغى

و لا ليلى صاحبتى اللى هاتموت على الجيبة البنى الجديدة و نفسها تستلفها منى و مش قادرة

تروح متصلة بيا و مصطفى جوزى جايب لك عريس زميلة تحفه تعالى يوم الاربعاء علشان تشوفيه

طب نخليها الجمعه علشان ابقى اجازة

لأ الاربعاء و تجيبى معاكى الجيبة البنى الجديدة علشان عندى فرح يوم الخميس



كل دى مواقف ممكن نتعرض لها جميعا

حواز الصالونات

ان ييجيى لك عريس لا تعرفيه ولا يعرفك و تبتدوا بقى تتعرفوا على بعض

عايزه كل واحده اتحطت فى موقف غريب تحكى لنا عليه

مين اغرب عريس اتقدم لك

اغرب مناقشه ممكن تكون دارت بينك و بين عريس

و اللى هاتتكسف تفضفض تستعمل السيم ده

نيرمين صاحبتى جالها عريس

كل ما كنت باتحط فى موقف من دول و اتكسف احكى على العريس و على الخيبه اللى اتعرضت لها

اروح على طول قايله مش نيرمين صاحبتى امبارح جالها عريس كذا و كذا و كذا

و ابتدى اعرف أراء الناس ايه



و بالنسبة بقى للشباب ممكن هما كمان يحكوا ما زى ما هى عروسة صالونات

اكيد حضرتك كمان كنت عريس صالونات



يعنى احمد صاحبك يشوف العلاوات نازلة ترف عليك و البارفانات جايبة اخر الشارع

يروح جاى تانى يوم و فى ايده ساندوتش

امسك دوق بقى اكل بوسى اختى اكلها لا يعلى عليه يجنن البت دى طباخه بريمو

شوية كمان و تلاقيه جاى يوشوشك و انت مش ناوى تيجيى لى البيت بقى نفسى اقعد معاك براحتنا و ندردش

و تبص تلاقى نفسك على الزياره اللى بعدها قاعد مشرف فى الصالون و بوسى داخلة عليك بصينية الشربات



او باباك يقعد يشتكى لعمو حسين صاحبه على القهوة

الواد ما بيقومش من على النت ليل نهار

هو المحروس فى سنه كام

سنه كام ايه ده اتخرج و بيشتغل

اتخرج و بيشتغل يبقى لازم تجوزه علشان تلمه و لا هاتسيبه لحد ما عياره يفلت او واحده من على النت تلف عليه عندك هدى بنتى زى القمر و فاضل لها سنه و تتخرج و اهو زيتنا يبقى فى دقيقنا


انا عايزاكم تفتحوا قلوبكم و ماحدش يخبى حاجة

و انا ان شاء الله هابتدى انزل لكم باول عريس

بعد الفاصل .........

العريس الأول

العريس ده جاى لنا حلو و ابن ناس و من طرف واحده من صاحبات مامتى

مؤهله يا طنط

بكالوريوس تجارة يا حبيبتى

شغله

هو ده برضه يتسأل على شغله

ليه وزير الخارجيه

لأ وزير الخارجية ايه ده بيشتغل مع باباه

بيشتغل ايه يعنى

بيشتغلوا فى التجارة ابوه و لا الحاج متولى عنده تجارة قماش قد الدنيا و العريس ده هو اللى ماسكها له

طب و ماله نشوف

الواد جه

شكله فعلا من اول وهله ابن ناس

قعدنا نتكلم صوته واطى و مؤدب و هادى

الحمد لله

المهم ابتديت اتناقش معاه فى الدراسة و الدنيا و الشغل يعنى علشان اعرف دماغه فيها ايه بالظبط

الاقى البيه يقول لى ايه

احنا هانعمل فرحنا ازاى

نعم فرح ايه

الفرح بتاعنا بصى بقى انا عايز فرح يكسر الدنيا

يكسر الدنيا ازاى يعنى

يعنى لازم يبقى فرح كبير قوى احنا مجاملين تجار مصر كلها و لازم نعمل فرح يليق بالناس اللى جايه تبارك لنا و تجاملنا

انا اكلمه عن الصلاه و ده يكلمنى عن عدد الراقصات اللى هانجيبهم فى الفرح

راقصات فى عينك يا بعيد انت اهبل يالا

اتاريه بقى ايه مفكر نفسه اللمبى و لقى الكراسه الصفرا و جاى لى علشان يسدد فلوس نعيم

و طبعا خرج بغير عوده


و نواصل بعد الفاصل ان شاء الله ........

عريس تانى



برضه طنط صاحبة ماما جايبه لى العريس و جايه

بس المرة دى بقى ماجاش لوحد

جايب اخته و اخوه و مراة اخوه ( منتقبه )

المهم الواد قعد شكلة هادى اووووووووى و ما بينطقش

و صاحبة ماما ابتدت تعرفنا على بعض

و الواد برضه ساكت و باصص فى الارض

شوية و الاقى مراة اخوه بتزغده فى كتفه

بصيت عليهم لقيتها بتوشوشه و سمعت كلمة قولها من دلوقتى

لقيت الاستاذ بيبص لى و يقولى ايه رأيك فى النقاب

قولت له نعم

قالى النقاب انا عايزك تتنقبى بعد الجواز

فماما قالت له و هى لبسها دلوقتى ماله هى الحمد لله ملتزمه و لبسها محتشم

فالواد ما نطقش بس مراة اخوه راحت متكلمه

وماله يا طنط بس لما تيجى وسطنا بقى لازم تبقى زينا

و اخته تقولى على فكرة كلام سلفتك صح

بصيت لهم كده انا يتقالى سلفتك و ولما تيجى وسطنا هى حصلت

سلفة مين هو انا كنت لسه وافقت عليه اصلا

و المهم قضيت باقى القعده ما بانطقش لأن الباشا كان هايترفض طبعا

بس اللى غايظنى انه ما كانش بقه بيتفتح الا لما مراة اخوه تزغده الاول و توشوشه

قولت لنفسى بكرة لما اتجوزه اقوله تتعشى يا اسمك ايه

يقولى استنى لما اسأل سلفتك الاول

يا ولاد اللذين انا يتقالى سلفتك الكلمه دى عصبتنى اووووووى

المهم طنط الله يسامحها لما شافتنى ساكته و الناس قاعدين

راحت قالت لى يا بنتى ما تنطقى بقى انتى عايزة العريس يقول عليكى ايه هاتمه

( من غير أسنان يعنى )



روحت بصيت لها بغيظ و قولت لها تحبى اقوم اعضه لك علشان يعرف انى عندى سنان

طنط خدى الناس دى و امشى بدل ما اقوم انام و اسيبكم قاعدين


و برضه نواصل بعد الفاصل ........

عثل عثل عثل

يخرب بيت عرسانك يا دوشه

ايه يا بنتي الهبل ده لما تحبي تتجوزي قوليلي
عشان ابعتلك صندوق من اللي عندي وتنقي علي الفرازه

نواثل بعد الفاثل

صندوق مرة واحدة

ايدى على كتفك يا بنتى

ابعت لك العنوان

و لا على ايه اتعبك معايا

انا هاجى لك لحد عندك احمل و اشيل

كل سنة و انتى طيبة يا قمر

حرام عليكي انا مش قادر من كتر الضحك

ربنا يعزك يا دوشه

ربنا يسعدك دايما يا عاشق

و كل سنة و انت طيب

انا من راى يا دوشه انك كان وفقتى عليه وليلة الدخله كان دبحتيله القطه وبكده هيخاف منك وهيعمل حساب ليكى ومش هيروح لمرات اخوه تانى اتمنالك السعاده مع من يهواه قلبك

شكرا يا استاز ايهاب اسعدني مرورك

الاخ محمد شكرا علي النصيحه
بس انت
نسيت تقولى اهم حاجة : انه فالأخر النصايح دى هتخلية يتخنق منك و اما ينفجر فى مرة و يضربك او يزهق و يطلقك او يجنن و يقتللك :-))

دوشة الدلوعة

- لازم تتصرفى بسرعه انتى وهى ، لازم تتعلمى توقعى الشباب فى دباديبك ، والشباب جاهزين جدا ومستعدين بس انتى شاورى ، ، مش عارفه تعملى ايه ؟؟ يبقى تشوفى البنات اللى بتفهم بتعمل ايه وقلديهم وامشى على نفس الدرب:

1- هاتى ورقه وقلم واكتبى اسامى كل الشباب اللى مش متجوزين معاكى فى الشغل واعملى دراسة جدوى وشوفى مين فيهم ينفع وحاولى ترمى شباكك عليه .

2- الشباب بيموتوا فى الدلع ( بهاء سلطان : الواد قلبه بيوجعوا وعاوز حد يدلعوا ) يبقى الشاب اللى عليه العين الصبح ترمى عليه السلام بصوت ناعم وكله دلع ( سباح الخير .. قوليها بالسين بلاش بالصاد دليل على الرقه والدلع)

3- الشباب يموتوا فى المظاهر والبنت الستايل ، يعنى تلبسى ع الموضه ولو معرفتيش تلبسى ازاى افتحى القنوات الفضائيه وشوفى ايه مذيعه هتلاقيها سوووو ستايل ... قلديها

4- مفيش مانع من كلمتين انجليزى وسط كلامك عشان يعرف انك بنت كلاس يعنى بلاش حاضر وطيب قولى اوكى ، بلاش تقولى يالهوى ( قولى اوه ماى جاد) . وقوليلوا يا بيبى الكلمه دى بتهز كيان الشاب خالص !!!

5- اتبعى نظرية شاديه فى مسرحية ريا وسكينه (( اغريه يا سكيننه )) وده من اقوى الاسلحه اللى ممكن توقعيه بيها مانتى عارفه الشباب بيضعفوا بسرعه .

6- الشباب يموتوا فى البنت الرقيقه الحساسه (( اقلبيها نكد وكل كلمه دمعى دمعتين واستخدمى مناديل فلورا عشان ناعمه وقويه وكلها حنيه .. وياسلام بقى لو حصل اى موقف صعب قدامك يغمى عليكى وهويحاول يفوقك استعبطى وخليه يقلق عليكى ويعرف قد ايه انتى رقيقه ومرهفه.

7- لو عملتى كل اللى قولتلك عليه وفشلتى يبقى الواد ده مرتبط ومش عايز يقول او ممكن يكون مالوش فيها (الصراحه راحه على رأى مروه) ساعتها اوعى تيأسى ارجعى تانى لدراسة الجدوى اللى كنتى عملاها وشوفى غيره ماهم ماليين البلد .


الا مالقيش ياختي عندك عروسة ليااا

تقبلي مروري

والله انتى موهبة من السماء
الله يسعدك زى مااسعدينا

الله يبارك فيك يا استاز يحي
يارافع معنوياتي

شكرا علي المرور الطيب

ههههههههههههههههههههههه

تخرج و بيشتغل يبقى لازم تجوزه علشان تلمه و لا هاتسيبه لحد ما عياره يفلت او واحده من على النت تلف عليه عندك هدى بنتى زى القمر و فاضل لها سنه و تتخرج و اهو زيتنا يبقى فى دقيقنا

هو الموضوغ مثير ويجزب بكل صراحه وفعلا قراءته بكل تفاصيله
بس انت طلعتي كل القطط الفطسانه وكانا وحشين قوي
وانتو بس الاحسن
مع العلم محدش مطلع عنينا غيركم القصد انتي فهمتي اقصد ايه وعلي العموم اتمني تكوني حياديه وزي ما بتقولي كلام في حث الولاد ازكري شويه من الي عند البنات



دمتي بكل خير